Ӧдӱп јаткан јылда Москвада «Инфа-М» деген бичик басмада бийик ӱредӱлӱ заведениелерге керектӱ «Литература народов России» деп ӱренер бичик-пособие чыккан.
Бу бичиктиҥ авторлоры ады-јолы јарлу билимчилер Р.З. Хайруллин ле профессор Т.И. Зайцева. Бичикте Россия тергеезинде јуртап јаткан башка-башка укту, тилдӱ калыктардыҥ чӱмдемелдери бойлорыныҥ тӧс ууламјылары аайынча эптӱ, бир аай эдип берилген.

Авторлор јаҥы тӱӱкилик-чӱмдемел бедиреништӱ ишке ле теориялык шиҥжӱлерге тайанып, тӱӱкилик кӧрӱмле башкарынып, национальный литератураныҥ ӧткӧн јолын, онойдо ок бӱгӱнги айалгазын кӧргӱзет. 
Бичикте теорияныҥ сурактарын ээчиде кажы ла калыктыҥ чӱмдемелдери керегинде берилгени солун. 
Бӱгӱнги кӱнде Россияда јуртап јаткан калыктардыҥ чӱмдемел-литературазы аайынча база сок јаҥыс ӱренер бичик болуптыр. Оныҥ учун бичик бакалаврларга, магистрлерге ле аспиранттарга тузалу деп айдар керек.

http://kip-ra.ru/novosti/52/